كل عام و أنتم بخير ...أسأل الله تعالي أن يتقبل مني و منكم رمضان و ما كان فيه من صالح الأعمال و أن يتجاوز عن سيئاتنا...آمين...
الحقيقة إن الثبات بعد رمضان حاجة مش سهلة ...ولكن نسأل الله تعالي لنا جميعا الثبات علي الطاعة و الأعمال الصالحة...
كلنا في رمضان عشنا لحظات إيمانية عالية ...و فرح بالعبادة و الطاعة و القرب من الله تعالي ، (صلاة و تسبيح و قراءة قرآن و تهجد و تراويح) ، آه فعلا نعمة من الله تعالي علينا بها أن اختارنا لهذه الطاعات ، في الوقت اللي كان فيه ناس كتير قاعدين قدام المسلسلات و البرامج الهابطة اللي مش حتنفعهم ولا دنيا و لا آخرة، المهم ياريت نفتكر إزاي كنا واقفين بين إيدين ربنا تبارك و تعالي خاشعين و كانت تسليتنا في رمضان هي الأدعية و الأذكار و لما جه العيد كلنا كنا فرحانين جدا أكيد إنه عيد مختلف ، و كل واحد فينا حاسس إنه إتغير و إزاي منفرحش و الله تبارك و تعالي فرحان بينا و بتوبتنا ،و يباهي بنا الملائكة، طبعا كلنا بنحب رمضان و نفسنا السنة كلها تبقي رمضان ، بس سبحان الله ، دايما الأوقات الحلوة بتبقي قصيرة ...
طيب بعد رمضان عايزين نعمل إيه ؟؟؟
طبعا عايزين نكون عبادا ربانييين مش رمضانيين ...
العلماء ليهم بعض النصائح للثبات بعد رمضان ،،،ممكن تسمحولي أن نتشاركها سويا:-
1- إحذر شيطانك : لإنه خارج من الحبس بعد رمضان زي المسعور خاصة أول شهر بعد رمضان عايز يخليك تيأس من رحمة الله ، و تقول أنا متقبلتش و لما تعمل ذنب يقولك انته مفيش فايدة منك ...فحاول الحذر من شيطانك و دايما استعن بالله علي ذلك ، الشباب حيلاقوا أصحاب السوء يشجعوهم علي المعاصي تاني و البنات كذلك ، خللي بالك من التبرج و لبس الهدوم اللي بالي بالك ، و خلي بالك منأصحاب السوء و البحلقة في البنات ، يا أخي لو البنت لبسه لبس مش هوه خليك إنته مسلم مؤدب و غض البصر حتاخد أجر كبير إن شاء الله لأنك غضيت بصرك ولأنك جاهدت نفسك،،،حتي البنات اللي بتلبس اللبس ده مش حتلاقي حد يبصلها تقوم تحترم نفسها وتتحشم .
2 - إياك و هبوط الهمة العالية :-
يعني في رمضان صمنا و صلينا و ختمنا المصحف مرات ، و لكن بعد رمضان هبطت الهمة و ممكن كمان تروح عليك صلاة الفجر أو أي فريضة تانية و تبدأ تسيب المصحف و تقول بكرة حبقي أقرأ ، طبعا إحنا نكون واقعيين مش ممكن حنقدر نعمل أعمال رمضان بالضبط لكن علي الأقل منخليشالطاعات كلها تقع و تضيع مننا
طيب نعمل إيه؟؟؟
5 حاجات نحافظ عليها و لو بنمووت:
1 - نحاول نقرأ القرآن علشان نختمه و لو صفحة في اليوم
2 - الصلاة في أول الوقت للبنات و الصلاة في المسجد للشباب
3 - ذكر ربنا تبارك و تعالي حتي و انتي و أنت رايحين الكلية أو الشغل
4 - الدعاء و لو دقيقتين بعد كل صلاة
5 - حاول يبقي ليك صاحب ياخد بإيك للطاعة و تشجعوا بعض
كده إن شاء الله حنحس إننا اتنقلنا لوضع جديد و حال جديد مع ربنا
مع طبعا في كل ده الأساس الإستعانة بالله تعالي
2 - شكر النعمة بعد رمضان و في كل و قت: لازم نتعلم شكر ربنا تبارك وتعالي علي نعمه علينا علشان تزيد النعم دي
3 - صيام ستة أيام من شوال:
في الحديث الصحيح إن من صام رمضان و أتبعه بست من شوال فكأنه صام الدهر كله
4 - قيام الليل:
في الحديث إن قيام الليل هو شرف المؤمن فلا تضيعه حتي لو ركعتين بعد العشاء كل يوم
5 - التخلي عن الأشياء التي تغضب الله تعالي :
نحاوول اننا نعمل طاعات و نبعد عن المعاصي و نحاول نتلمس رضي الله تعالي في كل تصرفاتنا مع تجديد النية دائما
آسفة إني طولت عليكم ...و لكني أحبكم في الله ...
(اللهم تقبل منا رمضان علي ماكان فيه من تقصير و اجعلنا نثبت بعده علي الأعمال الصالحة اللهم اقسم لنا من خشيتك ما تحول به بيننا و بين معاصيك و من طاعتك ما تبلغنا به جنتك و من اليقين ما تهون به علينا مصائب الدنيا ، اللهم اهد شباب المسلمين و بنات المسلمين و اجعل النصر و التمكين علي أيديهم اللهم ائذن لشرعك أن يعود و يسود اللهم اجعلنا من حفظة القرآن و العاملين بحدوده يارب العالمين اللهم حبب شباب المسلمين في سنة نبيك (صلي الله عليه و سلم) اللهم اجمعنا بنبيك و حبيبك (صلي الله عليه و سلم )في الفردوس الأعلي و أتمم لنا اللذة يالله بالنظر إلي وجهك الكريم في غير ضراء مضرة و لافتنة مضلة ،آميــــــــــن و آخر دعوانا أن الحمد لله رب العالمين...
