حــــــــــــــــــــــب القـــــــــــــــرآن...

مما لا شك فيه إن فضل القرآن عظيم ، و ثوابه كبير...

و كل الناس أكيد تعرف ده ، لكني اتعلمت حب القآن من وقت ما كنت صغيرة و أنا لسه في مرحلة الإبتدائي، و كانت مدرسة الفصل (جزاها الله خيرا) بتحب القرآن و علمتنا أنا و أخويا الكبير إننا نحبه و نحفظه من سن صغيرة أوي، و سبحان الله القرآن و حبه أفدنا جدا في دراستنا و خلي عندنا و لله الحمد ذاكرة قوية ، (ده طبعا قبل ما تظهر أنفلونزا الطيور ،و غيرها، و قبل ما الشعب المصري كله و احنا منهم نصاب بالزهايمر المبكر بسبب الأكل و الميه و الهوا و كل حاجة )...

و كمان القرآن ليه بركة بتخلي الواحد ربنا يوفقه في حاجات كتير

و لما كبرت كنت صحيح لسه مش ملتزمة لكن الحمد لله كنت مواظبة علي الصلاة و حفظ القرآن، و دلوقتي و بعد ربنا ما من عليا بالإلتزام ،وفقني لمحفظة علمتني بجد أحب القرآن بطريقة مختلفة عن الأول ، فبقيت أي حد يقولي علي حلقة قرآن سواء قراءة أو حفظ أحس إني ممكن أأجل أي شيء و أروح و بقيت بفضل الله باحفظ قرآن أحسن من الأول و بالتجويد ، و تأكدت فعلا إن الهدي من الله تعالي و إن اللي ربنا يرضي عنه ييسر ليه أسباب الهدي و يوفقه إنه يكمل ...

اللهم ارزقنا الإخلاص في القول و العمل و ارزقنا حب القرآن و تلاوته علي الوجه الذي يرضيك عنا ...اللهم اهدي شباب المسلمين و بنات المسلمين لحب القرآن و العمل به و علمنا اللهم الكتاب و الحكمة و فقهنا في ديننا...ءامـــــــــــــــــــــين...