التاج ده و مجموعة الأسئلة اتبعتت من مدونة صديقة إسمها د.منوسي يا ريت تحاولوا تدخلوا عليها .... بجد حلووة و حتعجبكم أوي..
وأنا حاحاول أجاوب علي أسئلتها ....
من أنت؟ وكنت تحب تكون حد غير نفسك؟
أنا إنسانة عادية ... باحب التغيير...و الحمد لله أعتقد إني باتغير للأحسن ...مش باحاول أكره حد و لما باكون مقتنعة بحاجة جدا أحب أعملها جدا و أديها كل وقتي و ممكن كل طاقتي
لأ مكنتش أحب أكون حد غير نفسي لأني علي الرغم من عيوبي اللي عارفاها و اللي مش عارفاها عاجبني نفسي كده و بحب منال كده زي ماهيه
بتدون ليه - امتى - لمين وفين؟
بادون علشان شايفة انها فكرة كويسة و ممكن ألاقي حد متشابه معايا في الأفكار ممكن حد تاني يستفيد مني ...كده يعني...
امتي بادون: ده في أي وقت خاصة لما أكوم فاضية شويا
لمين لأي حد من الناس ممكن يعجبه الكلام و يستفيد...
فين ؟ في بيتنا لأني باكون في حالة ذهنية صافية او متاح اكثر الشغل علي النت.
منظر أو موقف مش قادر تنساه عمرك؟
المواقف اللي مش بتتنسي كتير ... لكن اكتر موقف ويمكن بتكرر معايا و يأثر فيا جدا لما أكون خلاص وصلت فعلا لمرحلة الإختناق من أي شيء مضايقني و ألاقي ربنا سبحانه و تعالي يفرج عني همومي كلها دفعة واحدة بجد ...وكأن مكنش فيه حاجة خالص سبحان الله ده بجد حصلي ومازال بيحصلي طول عمري ....
أما المنظر اللي مش ممكن أنساه و إحنا بنوصل ماما (ربنا يخليها و يطول في عمرها في الخير و يعطيها الصحة) وهي رايحة العمرة كنت حاسة اني بموت و مش عارفة أموت شعور صعب أوي صحيح هي كانت مسافرة لأشرف مكان علي الأرض ولكن شيء خارج عن إرادتي كنت فعلا حاموت....
أمنية شبه مستحيلة نفسك تتحقق؟
تحرير فلسطين من اليهود و تحرير المسلمين من قيود الجهل و التخلف و الأفكار الخاطئة و العودة للإسلام الصحيح...
تحب تكون مكان حد مشهور ؟مين ؟ وحتعمل ايه وقتها؟
لأ محبش أكون مكان حد مشهور علشان عارفة إن الشهرة ليها متاعب أنا مش قدها بصراحة .
شايف مستقبلك إزاي ؟
شايفة إني ممكن إن شاء الله أعمل حاجات كويسة في مجال الدعوة و التربية ...المهم ربنا إن شاء الله يوفق.
تختار زوجتك /زوجك عل أي أساس؟ المال /الدين/الجمال/ المستوى الأجتماعي ؟
الحقيقة أختار زوجي إن شاء الله علي كل الأسس دي و لكن بترتيب و أولويات معينة
يعني مثلا: يكون متدين بجد بس برضه يكون شيك شكله مقبول مريح مستواه الإجتماعي جيد معاه الفلوس اللي ممكن تفتح بيت معقول برضه .
امتى يكون الحب أعمى؟
لما الإنسان يحب حد و يحس انه حابب اخطاء الشخص اللي بيحبه و يمكن كمان يشوف عيوبه مميزات...
شايف الدنيا إزاي؟
حلوة علي الرغم من إنها ساعات بتدي ألوان غريبة أسود و أزرق كده لكن الحمد لله أنا دايما باحس ان فيه أمل....
صفة أو عمل جميل نفسك نشاركك فيه؟
الأمل ... كتير اوي بالاقي ناس اتقتل فيهم الأمل بسبب ان كل الظروف اللي حواليهم متشجعش إلا علي اليأس و الإحباط و أنا عذراهم لكن الواحد يحاول يقوي و يطمن نفسه إن فيه أمل في الحياة علشان يعرف يعيش...
كمان الإصرار علي الشيء اللي مقتنع بيه حتي لو الناس عارضوك بس علي شرط متبقاش حاجة الكل متفق علي انها غلط مثلا لكن الأفكار الجديدة مثلا أو الطموحات العالية اللي ممكن تيجي مع شوية حماس.
ليست هناك تعليقات:
إرسال تعليق